مقبرة الرعب - قصة رعب بالدارجة المغربية
مقبرة الرعب
 |
| قصة مقبرة الرعب بالدارجة المغربية |
صاحب القصة : أمين
السلام عليكم الإسم ديالي أمسن عمري 22 سنة غي مريح فالدار حيت واليديا كيحساب ليهوم راني حمق اولا مسطي تبعو معانا لا بغيتو تعرفو قصتي كفاش بدات .
هادشي بدا عام 2009 كان عندي Bac لي شديتو الحمد لله و لي دوز الباك غادي عرف بأن هاد العام كيعيا فيه بنادم بزاف و كيبغي يرتاح ملي إسالي و هادشي علاش قررت ندير شي رحلة أنا و عشراني لا خوتي هههه أشرف
و سيمو كنا معروفين بالتسطيا ديالنا و ݣاع المصائب درناها ب 3 بينا و عشرتنا بدات من الصغر خلاصة القول كنا توام ولكن كل واحد من أم اخرى. كان عزيز علينا التخيام و الصفر و تسركيل .
مهم قررنا باش نصافرو ولكن حرنا فين بلاصة غادي نمشيو حيت معدناش مع البلايص العامرة ( فيها الهرج و الصداع ) بحال المدن الكبار ولكن حنا كنفضلوا الغابات و الجبال يعني البلايص لي معامرينش ببنادم ، كل واحد و أش كقتارح ولكن فاللخر قررنا نخيمو فالغابة ديال معمورة ل حدا الرباط ، ضربنا حسابنا شحال غادي إخصنا ديال الفلوس داخلا فيها فلوس المازوط و الماكلة و شي حوايج مهمين ، معندناش حتى مشكل فالطرونسبور ، مهم كل واحد جاب جطو فالفلوس هبطنا تقدينا اللحم العطرية الخضرة الخبز غاع داكشي لي غادي نحتاجوه فهاد السيمانة خديناه و تافقنا باش الغد ليه غادي نديرو ديپار مع الصباح بكري، أشرف أيدوز عندنا إهزنا من ديورنا و داكشي لكان وصل الصباح لقيت مي مسكينة فايقة كتسنا فيا عنقاتني و قاتلية ردو البال لبعضياتكم و قول لأشرف إصوݣ بشوية قلتليها متخافيش الحنينة ، بست ليها راسها و خرجت لعندو و دزنا عند السيمو و هزيناه معانا حتا هو ، كانت شي 6 ديال الصباح ديك الساعة و راكوم عارفين العشران من كيتلاقاو شي شاد ف شي و بقينا كبنلانيو كيفاش غادي ندوزو هاد السيمانة و كل واحد فينا شنو قال و لكن فلخر تافقنا باش نخليو الطونوبيل فشي أوطيل كاين تماك و حنا نهزو لي صاكادو ديالنا و نشوفو شي حد ولد المنطقة لي ورينا البلايص الزوينين فالغابة و نخيمو تما ! إيه كلشي قبل ، خلينا أشرف كيصوغ و نعسنا حنا. من فقنا كنا تماك مع شي 8 و نص حينت بين الجديدة و الرباط ماشي بزاف مهم هبطنا فطرنا فواحد لقهيوا و من تما مشينا لواحد البلاصة كيكون فيها المخيم ديا الدراري صغار فالصيف صافي دوينا مع واحد السيد باش الطونوبيل تبقى فديك لبلاص و وصينا العساس و هو نيت سولناه على شي حد إكون عرف هاد الغابة مزيان ، قالينا واحد هو لي حافضها بحال صباع إديه سميتو سعد خدينا النمرة و و تصلنا بيه.
و درنا معاه باش إجي عندنا حدا المخيم ، دازت نص ساعة تقريبا او هو يبان ولد صغير تكون عندو شي 21 باينة فيه ولد العروبية، عرفتوا غير من هدرتو . دوينا معاه تافقنا على الثمن و بدينا ديك الساعة نيت الرحلة ديالنا رحلة موراها غيم--وت لي م--وت إنت--احر لي نت--احر و هادشي كلو سباب الزعامة الخاوية تبعو معانا.
أول نهار داز يا سلام الضحك و النشاط سعد بالزربة دار بلاصتو حيت ضحوكي و نكايتي، او ورآنا شي بلايص فالغابة قليل لعارفهوم شي بلايص ديال السباحة ما واصلهومش بنادم ، الخلاصة نهار داز واعر بزااااااف، المهم وصل الليل و قلنا أش غنديرو مانديرو نقلبوها خلعة كل واحد إعاود شي حاجة كتخلع بقات النوبة دايرة تا وصلات عند سعد و هنا أتبدا القصة .
سعد : هادشي لي غادي نعاود ليكوم هاد ليلة راه ماشي قصة أو حكاية هادشي بصح و شحال من واحد تسطا و حماق و نت--احر بسباب هادشي ، هادي قصة واحد المقبرة كاينة فوسط واحد الغابة لي كيقارب منها كتسطا حيت كتشوف شي حوايج خايبين بزاف شي حوايج تا دماغ ما يقد يصبر عليهوم و ناس لولين كقولو بلي ديك البلاصة مسكونة، 😱 وكل عام و بضبط فشهر 6 كيتسيفو شي حوايج على شكل بنات زوينات بزاف و كيغريو الحطابة باش إتبعوهم ولي تبع الشهوة ديالو و مشا معاهوم كاياخدوه للمقبارة و لي وصل تماك كيتسطا و كيبقا تابعو داكشي تا كيقرب اموت بالخلعة أنا علمتكم دابا ردو بالكم مزيان.
ههههههههه أنا ضحكت عليه بزااااف حيت هادشي جاني بحال شي قصة ديال هادوك الأفلام القدام معلينا نعسنا ، دازت السيمانا كلها هانيا غي الضحك و النشاط و الضحك حتى لنهارنا اللخر باقي عليه بحال اليوم كنا دايرين باش نمشيو لواحر البلاصة تماك ديال السباحة كانت شي 4 ديك الساعة و هي تبدا الضبابة كتنزل لدرجة أن لي حداك مايبانش ليك بمرة صافي مابقيت كنسمع تا صوت حدايا آه تودرت بقيت كنغوت سعد أو والو ماكاين حتى جاواب بقيت غادي بوحدي كنحاول نتبع الضو ديال الشميسا لي بشوية بشوية بدا كيغبر تما عرفت بلي المغرب قرب و أنا مزال بوحدي ههههه و ما غادي نتفكر غير ديك القصة ديال المقبرة لي عاودها لينا سعد ولكن هاد المرة ما ضحكتش شداتني الخلعة ديال بصح و ريحت فبلاصتي حليت تيليفوني لقيت الريزو ماكاينس أميمتي أش هاد الحالة وحلة ديال بصح.
شوية كنحس بشي إيد حطات فوق كتفي ههه و مع القصة ديال المقبرة فراصي شداتني الخلعة ديال بصح كندور كنلقاها واحد البنت آية من الجمال و ديك الساعة كانت طاحت الضلمة قاتلي مالك عاودت ليها ليكاين قتليها را تجليت و تلفت على صحابي قاتلي و اش 3 دراري قتليها اه قاتلي راني دزت عليهوم فالطريق قاتلي يالله معايا نوريهم ليك أنا ديك اللحظة تفكرت الهدرة ديال سعد و بقيت كانفكر نمشي ولا نبقا و فاللخر غادي ناخود القرار لي غادي يغير حياتي 180 درجة متصوقتش لهدرا ديال سعد و مشيت معاها فينما كنحاول نشوف فرجليها مكنقدرش بقينا غادين فالطريق واحد العشرة دقايق حتى وصلنا لواحد الخلا و هي تبدا تقرب مني بشوية بشوية و كتقول ليا بغيتك صراحة الفورما عندها واعرة و مقديتش نشد راصي و تبعت الشهوة ديالي و مارست معاها من سالينا كنت عيت بزاف تكيت و جات تكات على الصدر ديالي و قاتلي بلي وليت ديالها دابا أنا بديت كنغيب بشوية بشوية صافي من بعد غي السكات و الضلمة من فقت كان الصباح و لقيت راصي فالمقبرة و ناعس حدا قبر أول مرة كنحس بالخلعة فحياتي . قشعت الباب و بديت كنجري فحال لهبيل تا وصلت ليه و تخيلو شكون لقيت أشرف و سيمو فوجهم باينة الخلعة تا هوما وقع ليهوم نفس لبلان تافقنا منقولو ل سعد والو و تمشينا واحد تولوت ساعة تقريبا ، جبدت تيليفون لقيت الريزو و عيطت لسعد عطيتو الأوصاف ديال البلاصة ليحنا فيها و مع هو حافض الغابة مزيان عرفنا فين و جا عندنا. صدق الليل كولو او هو كقلب علينا و مالقاناش و كان غادي إمشي عند البوليس ولكن عيطنا ليه سولنا كفاش تاتلاقينا و قلنا ليه غي بالصدفة و حنا الله عالم بينا صافي قالينا سعيد واش ليوم هو اللخر قلت ليه آه صافي قصدنا المخيم فين حاطين الطونوبيل ديالنا خلصنا العساس توادعنا مع سعد و خدنا النمرة ديالو و شدينا الطريق و لكن هاد المرة ماكاين لا ضحك لا ناشطا غي السكات من الرباط تال الجديدة من وصلنا كل واحد حطو أشرف حدا دارهوم و مشا هو للدار
من وصلت للدار كانت شي العشرة ديال صباح ديك الساعة لقيت الدار مزال كفطرو، سلمت عليهوم قالو لي أجي تفطر قلت ليهوم بصحا و الراحة و مشيت أنا ندوش دخلت طلقت السخون و ترخيت مزيان حيت كنت عياان بزاف مهم ساليت مشيت قدام لمرايا باش نمشط شعري ولكن وجهي ماكيبانش فالمرايا ناري والو ماكنبانش خرجت كنجري عند الدار كان الواليد خرج ديك الساعة ميمتي مسكينة كتقوليا مالك او لدي و أنا كلمة وحدة ليكاينا ف فومي وجهي ما كايبانش فالمراية و كنغوت و هي مسكينة كتعنق وتصبر فيا راك غير تخيلتي إمكن قلت ليها اللا أجي تشوفي راه والو ماكانبانش و هي دايرة ليا خاطري و مشات معايا و بان وجهي قاتليا شتي راك غي تخايليك قاتلي سير توضا اوصلي أولدي ونيت صليت ورتاحيت شوية ولكن هاد يومين أدوز صعيبة بزاف كل ليلة كا نبات نحلم شي أحلام مرعبة بزاف و ملي كنوض كنلقا راصي مخبوش من إيديا و رجليا و وليت كنلبس الطويل فعز الصيف باش الواليدة متشوفش داكشي لي فيا . مع لوقت ماابقيتش كنحس بيه كيحساب ليا راحنا مزال ف 2007 تا بنادم كرهتو وليت إنطوائي او معزول بزاف و الدار لاحظو هادشي فيا ولكن الله غالب راه ماشي لخاطري و أنا نتفكر الدراري عيطت ليهوم و قلت ليهوم نتلاقاو فالقهيوة المعلومة صافي هبطت باش نمشي عندهم لبست حوايجي و بديت غادي و أنا ندوز من واحد الدريبة خاوية معروفة بالكريساج ههه ولات فيا الزعامة بزاف ،
لزييات فودنيا و غادي فطريقي او هوما يوقفو عليا واحد الجوج واحد فيهوم نطق او هوا يقوليا جبد داكشي ليعاندك بلا صداع و مع المزيكة متمزكتش ليه و حنيت راصي و تميت غادي و هو يشدني من كتفي و قاليا تصحب راصك واعر من غندور عندو و نشوف فيه بدا كيغوت و بدا كيجري غي بوحدو صاحبو شاف داك المنضر و دار فيها صحيح يلاه غادي بغي يضربني بالموس و هو يتخبط مع الحيط غي بوحدو و غيب إنا غي شفت داك المنضر قدامي و عطيتها للجري وخا خرجت مني فديك الدريبة بقيت كنجري بحال الهبيل و بنادم حاضيني تا وصلت للقهوة بديت كنكح او العطش قلت للسرباي شي شريبة الله احفظك مسكين جاب ليا الما و قال ليا را عشرانك الفوق كيعرفني حيت إيام البريباراصيون كنا ديما هنا مهم طلعت عند الدراري.
وصلت عاد الدراري كنلهت و سولوني مالك عاودت ليهوم لي كاين صدقو تا هوما ولاو كيطراو ليهوم شي حوايج ما شي نورمال المهم بدينا كنقلبو على الحل و حنا نتفكرو سعد آه عندنا النمرة ديالو و ديك الساعة عيطنا ليه .
أنا : ألو سعد
سعد : وي عشيري توحشتكم و الله
أنا : حتى حنا المهم بغيناك ضروري واش تقدر تجي عندنا للجديدة
سعد : ياك هانية وي نقدر ولكن تال السيمانة الجاية حنت ختي دايرة العرس و باغي نحضر معاهوم
أنا : صافي اوكي المهم من تبغي تجي علمني باش نتعرض ليك ف المحطة ، بسلامة
سعد : الله اعاون
صافي ساليت معاه المكالمة و تافقت أنا و الدراري باللي غادي إجيو عندي للدار باش نبقاو مجموعين تما ، بينما لقينا شي حل ولكن خصنا شي سبة نقولوها للدار مهم ديورهوم كانو مصافرين و كانت هادي هي السبة قلت ليهوم صافي دابا باي من نعيط ليكوم أجيو عندي و داك شي لي كان مشيت للدار و قلتها للواليدة وافقات حنت أشرف و سيمو أصلن ماشي شي وحدين غراب راحنا كبرنا بتلاتة المهم عيطت ليهوم و قتليهوم دوزو عندي، مشات الواليدة قادت لينا الدار الفوق و قاتليا راحنا أنصافرو واحد السيمانا لخالتك قلت ليها واخا غدا فالصباح انشاء الله غادي نمشيو و نرودو البال مزيان. صافي جاو عندي الدراري و طلعنا الفوق،كانحاولو نساو هادشي لولينا عيشينو. خدمنا البلاي و بقينا مقصرين أنا مكنعرفش نلعب مزيان بردوني ههههه مشيت شعلت البيسي وحليت الفايس و بقيت مكونيكتي و هو يوصلني واحد الميساج فيه الموت ستلحق كل من دخل أراضينا فاللول كحساب لي غي شي واحد مطلعها و لكن ملي كنبغي ندخل لكاتب لي الميساج كيتبلوكا البيسي و كيطفا ناري الخلعة شداتني و ما قلت للدراري والو صافي مخرجناش هاد الليلة و الواليدة طلعات لينا العشا قصينا و نعسنا، فقت مع اليل باش نبول حاشاكوم غي قربت للحمام لقيتو مسدود والضو شاعل كنتلفت كنلقا الدراي بجوج ناعسين شوية تحل الباب ديال الحمام و أنا مزال كنفكر واش ندخل و لا مندخلش و فالأخر قررت ندخل للمجهول
درت واحد لعيبة لأي واحد غادي إعتابرها زعامة خاوية مهم دخلت وانا نلقى واحد المنظر زغب إيديا وقف قط مقطع ليه راس ديالوا حدا الباب و الجسم ديالو معلق الوسط و مكتوب ب الدم فالحيط الموت جاي أنا غي شفت داك الديكور صافي تبلوكيت شحال من بلان جاني فبالي ولي غادي سالي معايا هو الإيد لتحطت على كتفي كنتلفت باش نشوف وياريتني ما درتها كنلقا غي الشعر و الوجه ما باينش قاتلي أنا مرتك الجديدة أنا من سمعت هاد الجملة صافي غيبت و غنفيق غنلقا راصي فبلاصتي أواه هادشي غي حلم الله على راحة نضت كنجري للحمام مالقيت والو زدت تيقنت بلي هادشي غي حلم ولكن من بديت كنغسل كنشوف إيدي كنلقاها فيها شي حاجة صفرة كنحاول نغسلها والو فيقت الدراري بالزربا قالو لي هاديك راها حنا و يمكن راك تجوجتي بجنية غوت جنيييييييية ناري قفارت أنا هبطت عند الواليدا لقيتهم صافرو معرفت ماندير تلفت واش أنا كنت ناوي النشط و نضحك وليت فهاد الحالة صافي وليت كنفكر ننتاحر و مشيت عند المون و بديت كنفكر نلوح راصي ولكن مقدرتش تفكرت بلي راه حرام و عذاب لهيه كتر من عداب هنامن بعد مشيت لواحد الكوان و بديت كنبكي ديال بصح مهم شي 2 سوايع و أنا تماك جبدت ألو شعلتو كنلقا الميساجات ديال الدراري و المكالمات صايفطت ل أشرف ميساج قتليه أنا جاي و مشيت عند واحد مول المسمن جاني واحد الجوع ديال بصح ههه كلشي نصبر ليه إلا الجوع قصيت مزيان و رجعت عند الدراري لقيتهوم مخلوعين بالمزيان، هاد السيمانة دازت صعيبة كل نهار غي كودن المغرب كنعيشو الرعب فالدار ولينا كنشوفو داك شي بعينينا مريحين و الدوش خدام مريحين و الطبلة كتحرك قدامنا مريحين التلفازة كتطفا و تشعل الخلاصة الرعب ديال بصح وصل نهار الحد و هو يعيط ليا سعد باش نمشي نجيبو من المحطة مشينا عندو غي شفتو و تلاحيت عنقتو حنت علمنا باش منغلطوش و غلاطنا هبطنا للدار و عاودنا ليه قالينا واحد لي قدر إعاونا واحد الفقيه فالشياضمة حدى الصويرة أنا فديك الحالة يقول ليا يلاه للمريخ نمشيو تافقنا باش الصباح نتحركو بكري
خرجنا فالصباح بكري مع شي الخمسة باش نوصلو لديك لبلاصة و نلقاو الدنية خاوية و نقديو غاراضنا بكري و داكشي لكان كنا تماك مع 10 ديال الصباح ، غي الجبال و الفيافي لي كاينين و كل دار بعيدة على ختها بمسافة صراحة مرتاحيتش لهاد البلاصة بزاف معلينا حطينا الطونوبيل حدى دار ولد خالت سعد الصراحة ستقبلنا مزيان وخا ناس على قد الحال ولكن لي كاينة يحطوها ليك ، إوا خرج معانا سمير ل هو ولد خالت سعد وبقينا شادينمعاه الهدرة صدق إجازة فالأدب الإنغليزي إييييييه ولكن الخدمة والو خدام غي عند واحد مول الهري كفرت على هاد الوضعية و نسيت حالتي أنا . المهم الطريق كاملة و حنا داوين تا وصلنا عند دار السيد لضاربين الطريق على ودو ، دار صغيرة و مبنية غي بالطين كتخلع الواحد غي من الشوفة. دخلنا شدينا النوبا مع العيالات (حضيو راسكوم ) من وصلت نوبتنا قصادنا البيت لي مريح فيه أش غادي نقوليكوم الدخاخن ديال بصح ريحت البخور كتخنق و المجامر دايرين . مع غدين نبغيو ندخلو غادي يدير واحد الشوفة ديال الخلعة بحالا إلا تصدم قال لينا بركو هي هاديك قالينا شنو كاين عاودنا ليه البلان كامل و محدنا حنا كنهدرو و هو كلمة وحدة لي على فومو مزيان مزيان من كملنا قلنا ليه شنو الحل صدمنا و قاليا خصنا نرجعو من بدا هادشي ناري الغابة تاني بقيت ساكت و شفت في الدراري و بان ليا فالوجه ديالهوم الرعب ولكن هادا هو الحل لكان عندنا قلنا ليه واخا ولكن أتصبرو عليا يوماين عاد غادي نمشيو صافي مشات إو و خرجنا من عندو مزال عند الباب عيطات ميمتي ألو يوسف واش نتا لاباس كنت باغي نقوليها لا أميمتي را ولدك قريب أهبل و لا ينتاحر جي را تقدري تلقايني في القبر ولكن ما قدرتش قلت ليها أه الحمد لله و نتي قالت ليا اللا حاسا بشي حاجة غتوقع و قلبي مزير عليا هه قلت ليها غي جاب ليك الله يالله تهلاي فراسك و ماديري فبالك والو أوا و قطعت ، صافي داز هاد النهار مريان و لكن النهار التاني و بالخصوص فالليل أيكون نهار إستتنائي .
دوزنا النهار الأول بخير الحمد لله نعسنا مزيان ولكن النهار التاني أيكون صعيب علينا بزاف كنا مريحين فواحد الشمبر فالدار ديال سعد كان مزال مأذن الظهر هاديك الوقيت و أنا نسمع صوت البكا ديال شي بنت درت عند الدراري و لقيتهوم تاهوما مصدومين قلت ليهوم كتسمعو هادي ليسمعت قالو أه ولكن الدار مافيها تا دري صغير و أقرب دار بعيدة ب نص ساعة يعني مايمكنش تسمعو حتى لا كان. نيت بالزربا مشا هاد الصوت هاد المرة صافي نسينا جابو لينا نتغداو ومن بعد خرجنا مع سمير نبدلو الجو شوية واخا كاين الحجر ولكن حسن من والو حاس براصي مخنوق و نفسي مضيقة ولكن بانو ليا الدراري نشطو شوية ومبغيتش نخصر ليهوم المورال، النهار غادي مزيان تال هنا وصل الليل و رجعنا عيانين غي وصلنا و تلاحينا باش الصباح نودو بكري و نشدو الطريق ، صافي طفينا الضو غمدت عيني و نعست وغنفيق على صوت البكا تاني ولكن هاد المرة بوحدي كنشوف جيهت الباب بانت ليا بنت صغيرة لابسا البيض كنسمع صوت البكاديالها و بدات كتجري و أنا تابعها بدون شعور معرفتش كيفاش تا تبعتها إمكن كنت مغيب أ مهم تابعها وصط الخلا و الحجر تا بعدت على الدار مزيان و هي توقف و أنا نتم جاي عندها قلت ليها شكون نتي مجاوباتنيش بدات بشوية بشوية كتقرب ليا و السيفة كتبدل ولات ختنا لي شفت فالغابة قالتلي هانا فرزتك دابا مدات ليا إيدها و قاتلي يلاه معايا و كلشي أيكون كيف كتمنا حتى أنا مديت ليها إيدي و بديت غادي ولكن شحال من حاجة طاحت فبالي صحابي قرايتي ميمتي و أنا نوقف قاتلي مالك قتليها ما يمكنش هادشي لوقع خطأ و صافي أنا إنس و نتي جن هادشي حرام مع قلت حرام تبدلات الصيفة الزوينة و ولات السيفة الخيبة نخليكوم تخيلوها بوحدكم وهي تقوليا الموت أنكويك فالغالي عليك و نتا أتبقا حي و غنحرق ليك خاطرك كيما حرقتي ليا خاطري من بعد ضرب ليا الضو ف عيني و بحالا عميت من غادي يرجع ليا الشوف غنلقى راصي وسط طريق غادي نشوف فجيهت ليمن ديالي غادي يبان لي كاميو جاي قدامي ،
غنشوف فجيهت ليمن أنلقا كاميو ما بقا بينو و بينو والوا غير شي 20 ثانية مع الصدمة ما عرفت نجري ولا نتسنا الواقعة هههه هادي اللخرة ليا واش هادي هي الموت لي قاتليا ختنا وقيلا صافي وصلات ساعتي غمدت عيني و بديت كنشاهد و أنا نسمع صوت مغريبش عليا يوسسسسف عندااااك و هزني وحسيت براصي تخبطت موراها غي الضلمة و سكات ههه إحساب لي راصي مت ولكن جا الصباح لقيت راصي فالبيت و جنبي ليمن عاطيني الصداع لقيت حدايا السيمو سولتو على أشرف قالي واش ما عاقل على والو أنا بديت كنعاود ليه على الحلمة قالي داكشي ماشي حلمة راه بصح لبارح فالليل كنتي كتجري وحنى سمعناك من فقتي و تبعناك ونتا بحال شي هبيل وسط الجبل و مشيتي للطريق و بغيتي تموت وقفتي قدام كاميو و كون ما أشرف كوراك دابا كفتا و سولتو على أشرف قالي راه تفدع من إيدو و مشا عند شي مرة تجبرها ليه تسنيت تا جا و مشيت عنقتو راه ماشي ساهل ترمي نفسك للموت على قبل عشيرك صافي كان البروكرام هو نهزو الفقيه و نقصدو الغابة عوتاني ، توادعنا مع سمير صاراحة تهلا فينا و مخالا تا حاجة ناقصانا هاد المدة،إو و سعد هو لي غادي صوك بينا حنت بجوجنا معطوبين و سيمو ما عندوش البيرمي دزنا هزينا الفقيه و شدينا الطريق أنا باقا هدرت ختنا فودني واش نيت تقدر ديرها و تقتل لغالي و العزيز عليا و شكون بالضبط هادو أسئلة بزاف دارو براصي ولكن معندهومش جواب ، و الوقت هو لي غادي يجاوب عليهوم ، نعست و درتها ف يد الله من وصلنا فايقوني هنا كان خصني نعرف داك الفقيه علاش ناوي من سولتو على شنو ناوي بدا كيخرج و يدخل في الهدرة خاطري ما رتاحتش ليه ولكن كان هو أمالنا الأخير إوا وصلنا الغابة هو كان جايب معاه شي خنيشة معرفنا أش فيها ، هو بدا غادي بينا وسط الغابة بحال إلا حافضها ماشي بحال ألى حافضها راه نيت حافضها بدا غادي بينا تا وصلنا للمقبرة
فاش وصلنا لمقبرو اهوا يجرني سعد قاليا هاد خينا مامرتاحش لو كفاش لي حافض البلاصة هنا حسن مني و كيفاش مطلب منا لا فلوس لا حتى حاجة مهم أنا را مامرتاحش لو قلت تا أنا المهم نتبعو الكداب تال باب الدارو ، مشيت عندو قتليه شنو البروجرام قاليا صبر تال المغرب و غنبداو إوا الوقت كامل و أنا بالي مشغول و تا واحد ما كيدوي مع لاخر وصل العاصر و هو ينوض قالينا أنبداو دابا باش ملي ودن المغرب إلقانا خدامين قتليه فاش شافيا قاليا لا بغيتي نحل ليكوم المشكل خدم و سكت عارف راصو ولد الحرام بلي منقدر نقول ليه والو يعني لوا ليا إيدي مشا الخنشة لي جاب معاه و جبد واحد الصندوقة و جبد منها واحد العصا و تلاتة ديال البالات (كحفرو بيهوم) عطانا شي قراعي قالينا خويو عليكم هادشي كنحل القرعة كنلقا داكشي حمر بقيت كنشوف فيه قتليه شنو هادا قاليا دم الحلوف غي سمعتها و أنا نشنق عليه قتليه واش تسطيتي ليوم غادي نحر دين مك و الدراري شاديني قاليا را هادا هو الحل ليكاين لا مبغيتييش صافي نجمعو قلوعنا و نمشيو شدِيت القرعة و فلتها عليا و حمرت فالدراري عينيا صافي تاهوما خواو عليهوم هاداكشي أنا تخلطو عندي الأحاسيس النداما مع الكره لداك خونا مكرهتش ندبح مو هنا نيت ، رايحنا الوصط وهو بذا كرسم واحد الدائرة و ديك الدائرة وسط دائرة بقا غادي تا وصل 3 و هو يجبد واحد الحنش و عيط ليا نود بالزربة قبل ماي أدن المغرب أنا كنقول هاد الزمر شنو باغي تاني عطاني الموس و الحنش و قال ليا دبح هادا و الدم رسم بيه فوق هاد الخطوطة خطفت ليه داكشي من إدو و قتليه أرا تشوف و جريت للحنش راصو تا بدا الدم كيرش و أنا بالزربة درت داكشي ليقاليا و رجعت عند الدراري لي شادهوم الرعب ديال بصح غي أدن المغرب و هو بدا كيقرا فالقرآن و لاح ليا اللعيبات باش نحفرو ومعاهوم ميكة سالا المغرب و هي تبدا الضبابة و الغوت و كبانو لينا الخيالات قدامنا مبقيناش كنشوفو سعد و الفقيه غي الخيلات قدامنا و صوت الدياب حدانا أنا حليت الميكة و هنا فين كانت الصدمة لقيت فيها إد ديال بنادم و موس و جوج وراق وحدة فيها أش خصنا نديرو خصني ندير الموس ف الإد و نكتب داكشي ل في الورقة فالأرض و نبداو نحفرو ناري من شديت ديك الإيد زاد الغوت ديال الدياب و من بديت كنكتب دوك الخيالات كوصلو تال عدنا و كيروجعو نخلي ليكوم المنضر نتوما التخيلوه بذينا الحفير و الصداع كتزاد شوية
ملي بدينا كنحفرو داكشي صافي ولا كوصل تال حدانا و كايةقف مورا واحد ثلاثين دقيقة تقريبا ديال الحفير او حنا نوصلوا لواحد الصندوق ملي جبدناه حسينا بالقشعريرة وسمعنا واحد الصرخة خيبة بزاف موراها صافي السكااات، وايلي زعما صافي نكونو سالينا من بعد غي سكات و بشوية بشوية بدينا كنغيبو من وراها صافي غي الضلمة أه غيبنا من غنفيقو أناقاقاو راسنا مليوحين فنفس البلاصة و سعد تا هو مغيب ولكن الفقيه الفقيه فيناهو أه دا داكشي لي جبدنا و هرب مشينا نجريو عند سعد حينت سايل ليه الدم من راصو مهم بقينا حداه تا فاق اوقلنا لو عاود لينا البلان كيفاش ، الشك ديالي كان فالمحل ديالوا ملي طاحت علينا ضبابة غبر على سعد و ضربو على راسو باش إغيب كان مبلاني لهادشي كولو من اللول هو باش إجبد الخزنة مكانش إقدر عليها بوحدو كان خصو شي واحد مسكون وهو فبلاصة واحد لقا 3 هادشي علاش مدوا لا علا فلوس لا على والو حنت داكشي لجبدو ساوي الملاين و كون قالها لينا كان إحساب ليه غاد نبغيو حقنا خدمنا ولد الحرام ولكن بلاتي زعما نكونو تفكينا من هاداكشي ما كاين لا موت لا والو حنت كنحس براصي مخفف بزاف ولكن حالتنا غاع دم خصنا نغسلو ، مشينا حنا و سعد لواحد البلاصة ديال العومان تشلبطنا مزيان غسلنا حالتنا و مشا هو يجيب لينا مانلبسو من دوارهوم إوا و شدينا طريق الجديدة عوتاني توادعنا مع سعد و قلنا ليه هادشي بيناتنا خاص تحد مايسيق الخبار أنا كان فاتني الصداع دونك أنا لي أنصوك إوا هي هديك وصلنا للجديدة ووهمنا راصنا بلي راه فاتنا داكشي و داز الصيف كان كلشي رجع للطبيعة ديالو تال نهار عيط ليا سعد وقاليا بلي عيط ليه سمير و قاليه بلي داك الفقيه لقاوه مدبوح وسط دارو أواه يعني هادشي مزال ماكمل
ههههه كنا كنحسابو اننا سالينا هاد القصة و كملات او النهاية كانت زوينة ولكن كنا غالطين او لفقيه لقاوه مدبوح فدار ديالوا او هو مادارش هادشي غير هوا بوحدو حنا شاركنا معاه بلا منحسو يعني نوبتنا،جايا جمعت الدراري فالقهيوة و قلت ليهوم بلي الفقيه لقاوه ميت و ملقاوش لي قاتلو و إحتمال مليكونش مات طبيعي يعني بسباب داكشي ليجبدنا الدراري تصدمو وبانت الخلعة فوجهم أه من حقهوم هادشي خياب بزاف وصيتهم بلي لا بدات شي حاجة أنورمال كطرا إعيطو ليا باش نلقاو حل لهادشي إوا صافي كانت بدات القرايا أنا كنت دافع الصونتر و بديت كنمشي و آندمجت فالجو ديال القرايا و احد النهار كنت خارج تال 6 و جيت عيان بزاف غي جيت و تلاحيت نعست و أنا نحلم بأشرف قالي راني مصافر تهلا فالواليدة أنا فقت كلي عرق عيطت ليه مع السبعة قلت ليه واش نتا صافا قالي عادي الحمد لله قلت ليه رد البال لراسك أصاحبي أوك هو ما فهم والو صافي و قطعت نهار كلو و أنا مرفوع حاس بشي حاجة غادا تطرا كنت قاري غي الصباح و العشية خاوية تغديت و نعست و أنا نسمع الدقان فالباب لقيتهوم الدراري حليت عليهوم مشقلب قالو ليا جري صاحبك راه نتااااااحر أشرف مات مااااااااااات شناوا مشيت لقيت الدنية مرونة البوليس و الصطافيط ناري أشرف مات خويا مات فلحضة رجع شريط داكشي لدوزناه من كنا صغار مشيت عند مو عنقتها و بقيت كنبكي و فديك اللحضة جا السيمو تا هو وصلاتو الخبار غسلناه ولكن ما صلاوش عليه حنت مات منتاحر هادشي لحساب ليهوم ، صافي غادين باش ندفنوه و أنا نتفكر نهار لاح راصو قدام الكاميو قدامي و بديت كنبكي تاني، وصلنا حدا قبرو دفناه و تسنيت تا مشا كلشي و عنقت تراب لفوق القبر و بديت كنبكي بزااااااااف و السيمو ورايا تا هو كنسمع صوت النحيط ديالو صافي جرني و قال ليا بلي خصنا نمشيو نعاونوهم فالعشا صافي ترجلت و مشينا عاوناهوم ، سالا كلشي و أنا نطلع لبيتو فيما ندور نلقى تصويرة ديالنا أترات فيا موتو بزاف
مشات أيام و جات إيام و مزال منسينا أشرف و فشهر 11 واحد النهار كنت تاني قاري غي فالصباح و العشية والو مشيت للدار لوليت مكنخرجش منها دخلت تغديت و نعست تاني ، فيقني صوت التيليفون ألو يوسف أنا السيمو هادشي فات القياس بسلامة و قطع خرجت بشورطي كنجري للباطيمة ديالهوم كنشوف فالسطح كنلقاه غدي يتلاح و بنادم مجموع معقلتش كفاش تا وصلت عندو حاولت نقنعو ولكن ماشي السيمو هاداك لدوا معايا دوا معايا واحد الصوت مغريبش علية قاتليا عقلتي ياك قتليك را غادي نكويك فالغالي عليك هاوا التاني أنقوتلو تاني قتليها صاف بعدي منو مشكلتك معايا أنا قاتلية فات الفوت و تلاح السيمو و تاهو مات
و أنا مرضت و ليت كنغوت بوحدي فالدار و بقيت بلا قرايا بلا والو و تا واليدية عياو معايا مخالاو طالب ما خالاو طبيب و لكن الغالب الله. قاتلي غنكويك و كواتتي فأعز ما كان عندي
هادي هي قصة المقبرة بدات بخبيرة وسالات بالموت
النهاية ديال القصة
ويلا بغيتي تحكيلينا قصتك نتا دخل هنا : حكي لينا قصتك
